Вашингтон, 18 октомври 2018 (МИА) - Aмериканскиот претседател Доналд Трамп изјави дека САД побарале  од Турција аудио и видео снимки во врска со исчезнувањето на саудискиот новинар Џамал Кашоги, „ако воопшто постојат“.

Истовремено Трамп ја нарече Саудиска Арабија важен сојузник истакнувајќи дека таа држава е голем купувач на американскиот воен извоз.

-Да, побаравме снимки... доколку постојат, рече Трамп пред новинарите додавајќи дека такви докази „најверојатно“ постојат.

Новинарот и колумнист на весникот „Вашингтон пост" Џамал Кашоги исчезна на 2 октомври откако влезе во Конзулатот во Истанбул.

Познат е како критичар на политиката што ја води актуелната власт на Саудиска Арабија, а го поддржуваше и весникот „Ал Ватан“, што претставува главна платформа на саудиските реформисти.

Во Турција е покрената истрага за неговото исчезнување.зш/07:30

###

Сите права се задржани. Овој материјал не смее да се складира, издава, емитува, препишува и повторно да се дистрибуира во каква било форма, без писмена дозвола од Македонската информативна агенција.